मृत्यू झालेल्या मुलींचा व्हिसेरा राखून ठेवण्यात आला आहे. तो पुण्यातील प्रयोगशाळेत तपासणीसाठी पाठवण्यात येणार आहे. अन्नातून विषबाधा झाली असावी असा प्राथमिक अंदाज व्यक्त होत आहे. सहाय्यक पोलीस निरीक्षक राहुल वरोटे घटनेचा तपास करीत आहेत.

कराड ः कराड तालुक्यातील सैदापूर येथील एकाच कुटुंबातील सख्ख्या तीन बहिणींचा अकस्मात मृत्यू झाल्याची घटना घडली. कुटुंबियांनी एकत्रित जेवण केल्यानंतर मध्यरात्रीच्या सुमारास तीन मुलींसह आईला उलट्या जुलाबाचा त्रास सुरू झाला. या तिन्ही मुलींना कृष्णा हॉस्पिटलमध्ये उपचारासाठी दाखल करण्यात आले होते. त्यादरम्यान त्यांचा मृत्यू झाला. आस्था शिवानंद सासवे (वय 9), आयुशी शिवानंद सासवे (वय 3), आरुषी शिवानंद सासवे (वय 8, रा. मिल्ट्री हॉस्टेल शेजारी, सैदापूर, ता. कराड) अशी मृत्यू झालेल्या मुलींची नावे आहेत. याबाबत पोलिसांनी दिलेली माहिती अशी, सैदापूर येथील मिलिटरी होस्टेल शेजारी सासवे कुटुंबीय वास्तव्यास आहे. सोमवारी सायंकाळी सहा वाजता सासवे कुटुंबातील सर्व सदस्यांनी एकत्रितपणे जेवण केले. मात्र मध्यरात्री एकच्या सुमारास शिवानंद यांची पत्नी आणि आरुषी, आस्था व आयुषी या तिन मुलींना उलट्याचा त्रास सुरू झाला. त्यामुळे तिघींनाही उपचारासाठी कराड येथे कृष्णा रुग्णालयात नेण्यात आले. त्यानंतर आस्था आणि कु. आयुषी यांचा मृत्यू झाला. आरुषीला कृष्णा रुग्णालयात दाखल करून तिच्यावर उपचार सुरू करण्यात आले. अतिदक्षता विभागात तिच्यावर उपचार सुरू होते. तिची प्रकृती सुधारत असतानाच आज सकाळी तिचाही मृत्यू झाला. मृत्यूचे निश्चित कारण अद्याप समजू शकलेले नाही. याप्रकरणी कराड शहर पोलीस ठाण्यात अकस्मात अकस्मात मृत्यू झाल्याची नोंद करण्यात आली आहे.