बंगळुरू : करोना प्रतिबंधात्मक लस घेतली तरी नागरिकांना खबरदारी घ्यावी लागेल. त्यांना महिनाभर निरीक्षणाखाली राहावे लागेल , असे मत बंगळुरातील क्ष-किरण तज्ज्ञ डॉ. सुंदर यांनी व्यक्त केले आहे. डॉ. सुंदर यांना ब्रिटनमध्ये फायजरची लस देण्यात आली होती.

३३ वर्षीय डॉ. सुंदर सध्या ब्रिटनमधील नॅशनल हेल्थ सर्व्हिसमध्ये काम करत आहेत. त्यांना १६ डिसेंबर रोजी फायजरची करोना प्रतिबंधात्मक लस देण्यात आली होती. या लसीचा दुसरा डोस पुढील तीन आठवड्यात देण्यात येणार आहे. याबाबत डॉ. दमदार यांनी आपले अनुभव सांगितले आहेत. लसीचा कोणताही दुष्परिणाम झालेला नाही मात्र ज्या ठिकाणी लस टोचली तिथं वेदना जाणवतात असे डॉ. सुंदर यांनी म्हटलं आहे.

लसीकरण झाल्यानंतर देखील नागरिक पीपीई किट वापरत आहेत. मास्कचा वापर करावा लागतो. जोपर्यंत बहुतांश नागरिकांचे लसीकरण होणार नाही तोपर्यंत सर्व खरबदारीच्या बाबींचे पालन करावे लागेल. जसे की मास्क वापर, सोशल डिस्टन्सिंग पाळणे, समोरा समोर बोलणे टाळणे याचे पालन केले जाते असे त्यांनी सांगितले. मोठ्या प्रमाणात लसीकरण होण्यासाठी आणखी काही महिने खबरदारी घ्यावी लागेल, असे त्यांनी सांगितले.

ब्रिटनमध्ये फायझर-बायोएनटेक लसीला युकेच्या औषध प्रशासनाने मान्यता दिली आहे. त्यानंतर या लसीचे नागरिकांमध्ये लसीकरण सुरु झाले आहे. गरोदर स्त्रिया आणि १६ वर्षाखालील मुलांना तूर्त या लसीकरांतून वगळलेले आहे. सहा देशांमधील ४० हजार नागरिकांवर या लसीची चाचणी घेण्यात आली आहे.