sports

प्रशासनाच्या हाकेला उद्योजक, व्यवसायिकांचा उत्स्फूर्त प्रतिसाद

खटाव तालुक्यात एका दिवसांत जमले ५० ऑक्सिजन सिलींडर : ऑक्सिजन सिलींडरच्या तुटवड्याची गैरसोय दूर होण्यास मदत

तालुक्यात कोरोनाची गंभीर परिस्थिती निर्माण झाली आहे. अश्या प्रसंगात ऑक्सिजन सिलेंडरसाठी तहसिलदार किरण जमदाडे यांच्याकडून विचारणा करण्यात आली. त्यावेळी आपण तातडीने कारखान्यावरील २० सिलेंडर उपलब्ध करून दिले. गेली २० ते २५ वर्षे आपण तालुक्यातील जनतेची प्रामाणिकपणे सेवा करीत आलो आहे. नियतीने संधी दिल्यास आगामी काळातही जनतेला चांगली सेवा देऊ. - प्रभाकर घार्गे (माजी आमदार)
वडूज : कोरोना बाधित रूग्णांना ऑक्सिजनची जाणवणारी कमतरता दूर करण्यासाठी ऑक्सिजन सिलींडर देण्याचे करण्याचे आवाहन प्रशासनाच्यावतीने करण्यात आले होते. त्यास खटाव तालुक्यातील उद्योजक तसेच लहान मोठ्या फॅब्रिकेशन व्यवसायिकांनी उत्स्फूर्त प्रतिसाद दिला. प्रशासनाच्या हाकेला तालुक्यातील उद्योजक तसेच लहान मोठ्या फेब्रिकेशन व्यवसायिकांनी प्रतिसाद दिल्याने एका दिवसांत तब्बल ५० ऑक्सिजन सिलींडर जमा झाले. सद्या तालुक्यात कोरोना बाधितांची संख्या झपाट्याने वाढू लागली आहे. तालुक्यातील वडूज, औंध, खटाव, पुसेगाव, कातरखटाव, सातेवाडी आदी ठिकाणी आयसोलेशन सेंटर सुरू झाली आहेत. याठिकाणी काही आक्सिजन बेड उपलब्धही करण्यात आले आहेत. त्यामुळे कोरोना बाधित रूग्णांना जाणवणारी ऑक्सिजन बेडची अडचण दूर होण्यास मदतही झाली आहे. मात्र आयसोलेशन सेंटर व त्यामधील रूग्णसंख्या व त्यांना लागणारा ऑक्सिजन यांमुळे ऑक्सिजन सिलींडरचीच मोठी कमतरता जाणवत होती. त्यामुळे काही वेळा तालुक्यातील या आयसोलेशन सेंटरमध्ये ऑक्सिजन सिलींडरचीच कमरतता जाणवत होती. त्यावर प्रशासनाने तालुक्यातील उद्योजक, लहान मोठे फेब्रिकेशन व्यवसायिक यांना त्यांच्याकडील ऑक्सिजन सिलींडर देण्याचे आवाहन केले. त्यानुसार प्रांताधिकारी जनार्दन कासार यांच्या मार्गदर्शनाखाली हे ऑक्सिजन सिलींडर जमा करण्याची मोहिम राबविली. तहसिलदार किरण जमदाडे, गटविकास अधिकारी रमेश काळे, नायब तहसिलदार सिताकांत शिर्के, तालुका वैद्यकीय अधिकारी डॉ. युनूस शेख, डॉ. संतोष मोरे, डॉ. सम्राट भादुले तसेच मंडलाधिकारी, गावकामगार तलाठी यांनी याकामी योगदान दिले. आरोग्य विभागाच्या अधिकारी, कर्मचाऱ्यांनी या सिलेंडरची पाहणी व सुरक्षिततेची खातरजमा करून त्याचे सेफ्टी ऑडीट करून त्याचे प्रमाणपत्र दिले. प्रशासनाच्या या आवाहनास प्रतिसाद देत तालुक्यातील उद्योजक तसेच लहान मोठे फेब्रिकेशन व्यवसायिकांनी आपल्याकडील ऑक्सिजनचे सिलेंडर दिले. एकाच दिवसांत तब्बल ५० सिलेंडर जमा झाले असून ते सातारा येथे भरून घेण्यासाठी पाठविले जाणार आहेत. त्यामुळे तालुक्यातील ऑक्सिजनचा तुटवडा कमी होण्यास मोठी मदत होणार आहे. तालुक्यातील कोरोना परिस्थितीवर मात करण्यासाठी प्रशासनाला सहकार्य करण्याची ग्वाही देखील उद्योजकांसह व्यवसायिकांनी दिली आहे.