सातारा पालिकेच्‍या अतीक्रमणविरोधी पथकाने आरटीओ परिसरातील अतीक्रमणे हटवत त्‍या जागा दिव्‍यांग बांधवांना उपलब्‍ध करुन दिल्‍या. या कारवाईस काही राजकीय संघटनांनी आक्षेप घेतल्‍याने काही काळ तणावाचे वातावरण निर्माण झाले होते.

सातारा : सातारा पालिकेच्‍या अतीक्रमणविरोधी पथकाने आरटीओ परिसरातील अतीक्रमणे हटवत त्‍या जागा दिव्‍यांग बांधवांना उपलब्‍ध करुन दिल्‍या. या कारवाईस काही राजकीय संघटनांनी आक्षेप घेतल्‍याने काही काळ तणावाचे वातावरण निर्माण झाले होते.
सातारा पालिकेने आरटीओ परिसरात दिव्‍यांग झोन जाहीर केला असून त्‍याठिकाणी अतीक्रमणे पालिकेने काढण्‍याचा निर्णय घेतला होता. यानुसार पालिकेचे अतीक्रमण हटाव पथक त्‍याठिकाणी दाखल झाले. या पथकाने रस्‍त्‍यालगत असणाऱ्या चहाच्‍या टपऱ्या तसेच शेड हटविण्‍याचे काम सुरु केले. अतीक्रमण हटविण्‍याचे काम सुरु असतानाच त्‍याठिकाणी एका राजकीय संघटनेचे पदाधिकारी, कार्यकर्ते दाखल झाले. त्‍यांनी कारवाईस विरोध दर्शवल्‍याने तणाव निर्माण झाला होता.
चर्चेअंती त्‍याठिकाणी असणाऱ्या सातारा शहर पोलिस ठाण्‍याच्‍या अधिकारी, कर्मचाऱ्यांनी हस्‍तक्षेप करत कारवाई तडीस नेली. कारवाईदरम्‍यान त्‍याठिकाणच्‍या टपऱ्या हटविण्‍यात आल्‍या. अतीक्रमण हटविल्‍यानंतर ती जागा दिव्‍यांग झोननुसार दिव्‍यांग बांधवांना विविध व्‍यवसायांसाठी देण्‍यात येणार आहे.
आरटीओ परिसरात दिव्यांग बांधवांचा झोन असावा, अशी मागणी दिव्यांग प्रेरणा सामाजिक संस्थेचे अध्यक्ष अजय पवार यांनी केली होती. यासाठी त्यांनी विविध आंदोलनांमधून प्रशासनाला धारेवर धरले होते. याचेच फलित म्हणून अजय पवार यांची मागणी मान्य झाली आहे. मात्र, पालिकेकडून दिलेली तुटपुंजी जागा दिव्यांग बांधवांना मान्य नसल्याने याबाबत आम्ही पुन्हा आंदोलनाचे अस्त्र उगारणार असल्याचे अजय पवार यांनी सांगितले.